Textílfélagið fagnaði 10 ára afmæli sínu með veglegu sýningu að Kjarvalsstöðum vorið 1985. Alls tóku 29 félagsmenn þátt í sýningunni með 87 verk, eins og hægt er að skoða í sýningarskrá (UMF0867). Tveir rýnendur fjölluðu um sýninguna. Eins og svo oft virðist Bragi Ásgeirsson hafa allt á hornum sér og vildi greinilega aðeins sjá textíllistina sem einhverskonar þjóðlegt, hefðbundið listhandverk og virðist vera mikið í mun að hún teljist ekki til myndlistar. Hann skrifar m.a. „Ekki veit ég um neinn sannan málara, sem hefur ofið í vef eða myndskreytt á efni með aðferð sáldþrykks og nefnt svo málaralist — og myndhöggvara myndi aldrei detta í hug að nefna lágmynd eftir sig né formrænar tilraunir innan trefjaglers „textíla“, nei guð hjálpi mér …“ (UMF0784). Umfjöllun Halldórs B. Runólfssonar (UMF0789) er mun málefnalegri og þvert á Braga undirstrikar hann mikilvægi textíllistarinnar sem myndlistarforms og skrifar m.a. „…en eins og menn vita þá kemur íhaldssemi Íslendinga í veg fyrir að aðrar listgreinar en málaralist njóti sannmælis. Reyndar er sú furðulega einstefna í listmati einn helsti dragbíturinn á starfsemi félaga á borð við Textílfélagið“. Enn hefur mér ekki tekist að finna ljósmyndir af sýningunni. Miðað við þann fjölda félagsmanna Textílfélagsins sem tók þátt hljóta góðar ljósmyndir að leynast hjá einhverjum þeirra.